【on.cc东网专讯】 智能新世代，又点少得毛孩宠物嘅电子世界。信佳国际(00912)做开电子产品，接唔少外国大品牌生意，原来今年决定「自己嚟」。六月计划推PETBLE Tag同Feeder令主人可侦测心爱宠物嘅一举一动，兼全天候记录宠物日常情况等。
信佳主席兼董事总经理吴自豪话，传统净做电子产品嘅行业前景一定差，若产品谂新出路、新元素、新软件，相信有发展潜力。旧年信佳己有自家应用程序(Apps)，仲收集埋9,000几位宠物主人嘅会员数据，初步会透过购物优惠谷宠物产品新网站。
至于点解推自家宠物食品品牌，吴自豪就话，睇到外国宠物食品牌子虽然出名，但好似无考虑到中、港宠物生活环境与外国大相径庭，所以中、港唔少宠物都过肥咁话。信佳下一步会否连宠物寄养、兽医、殓葬都沾手？吴自豪就唔敢开空头支票，直言依家要搞掂网上业务先。
